01-10-2024
Азиз устозлар, қадрли мураббийлар!
Барчангизга бугунги байрам муборак бўлсин. Албатта, шиддат билан ўзгариб, ривожланиб бораётган бир даврда ёш авлодни Ватанимиз, халқимизга муносиб фарзанд қилиб тарбиялаш, жамиятимиз учун керакли шахс сифатида шакллантириш улкан меҳнат ва масъулият талаб этади.
Бугунги кунда Янгиҳаёт туманида фаолият юритаётган 17 та мактабда 1300дан ортиқ ўқитувчи ёш авлодга таълим-тарбия бериб келмоқда. Қолаверса, туманимизда турли соҳаларда мураббийлик қилиб, ёшларнинг порлоқ келажаги учун ўз хиссасини қўшаётган фидойи инсонлар ҳам кўп.
Кўз нури, қалб қўри, бутун борлиғини жамиятимиз келажаги учун бағишлаётган, отадек мўътабар, онадек меҳрибон Сиз, азиз устозларнинг ҳеч нарса билан ўлчаб, баҳолаб бўлмайдиган машаққатли ва шарафли меҳнатингиз қадри биз учун беқиёс.
Фурсатдан фойдаланиб, нафақат туманимиз, балки бутун республикамиздаги барча устоз ва мураббийларга сиҳат-саломатлик, хонадонларига файзу барака, бахту саодат, эзгу ишларида янгидан-янги ютуқ ва омадлар тилаймиз. Доим меҳнатларингиз роҳатини кўриб юриш насиб этсин!
Ҳурмат билан,
Янгиҳаёт туман ҳокими
Ҳаёт Иногамов
