01-10-2022
Ассалому алайкум, муҳтарам устоз ва мураббийлар!
Қадрли фахрийлар!
Аввало, Сиз, азизларни, сизларнинг тимсолингизда устоз деган шарафли номни улуғлаб келаётган туманимиздаги барча инсонларни Ўқитувчи ва мураббийлар куни билан самимий табриклайман.
Бугун ушбу айёмни нишонлар эканмиз, биринчи навбатда қадрдон мактабимиз, бизга ҳарф ўргатган, эзгуликдан сабоқ берган меҳрибон муаллимларимиз сиймоси кўз олдимизда гавдаланади.
Биз учун ибрат намунаси, юксак инсоний фазилатлар тимсоли бўлган азиз ва мўътабар зотлар шаънига энг гўзал сўзлар, эзгу тилакларимизни изҳор этамиз. Ҳеч қачон узиб бўлмайдиган қарздорлик ҳисси билан таъзим қиламиз.
Мамлакатимизда сўнгги йилларда илм-фан ва таълим-тарбия соҳасини давлат сиёсатининг устувор йўналишига айлантиришга қаратилган, оилада фарзанд туғилганидан бошлаб, камолот ёшига етгунга қадар уни ҳар томонлама қўллаб-қувватлайдиган, ҳаётда муносиб ўрин топишига хизмат қиладиган яхлит ва узлуксиз тизим яратилмоқда.
Президентимизнинг устоз ва мураббийларга йўллаган табрикларида: “Жамиятимизда боғча тарбиячиси, мактаб муаллими, олийгоҳларнинг профессор-ўқитувчилари ва илмий-ижодий зиёлиларни бугун биз интилаётган Учинчи Ренессанснинг тўрт таянч устуни деб эътироф этмоқдамиз. Шундан келиб чиқиб, уларнинг ҳурмат-эътиборини ошириш, хусусан, муаллим ва устозларнинг қадри, шаъни ва ғурурини тиклаш, машаққатли ва шарафли меҳнатини моддий ва маънавий рағбатлантириш бўйича бошлаган ишларимизни албатта янги поғонага кўтарамиз.” - дея таъкидлаб ўтдилар.
Биз бу жараёнда инсон капиталига эътиборни янада кучайтириш, бунинг учун барча имкониятларни сафарбар этиш борасида муҳим дастур ва лойиҳаларни амалга оширмоқдамиз. Масалан, бир йил олдин туманимизда 19 та боғча фаолият кўрсатган бўлса, ҳозирги кунда бу рақам 24 тага, тизимдаги қамров 52 фоизга, 6 ёшдаги болалар ўртасида эса 32,8 фоизга етди.
Мамлакатимизда янги турдаги ва янги сифат босқичидаги таълим масканлари, хусусан, туманимизда умумтаълим муассасаларининг қиёфаси ўзгариб, моддий-техника базаси яхшиланмоқда. Жумладан, ўтган ўқув йили мобайнида муҳтарам Президентимиз раҳнамолигида давлат бюджети ҳисобидан йигирма уч миллиарддан ортиқ маблағлар ажратилиши ҳисобига Янгиҳаёт туман тасарруфидаги 10 та умумтаълим мактабларида қурилиш-таъмирлаш ишлари амалга оширилди.
2021-2022 ўқув йилида 1 та замонавий мактаб лойиҳаси асосида барча қулайликларга эга 332-сонли умумтаълим мактаби қурилиб фойдаланишга топширилди. айни кунларда туман тасарруфидаги 333-сонли умумтаълим мактабига 990 ўринга мўлжалланган янги замонавий, қулай ва барча шароитларга эга бўлган бино қуриш ишлари амалга оширилмоқда.
Шунингдек, эътироф этмоқ керак, байрам арафасида туманимиздан 6 нафар устоз-мураббийлар давлатимизнинг юксак мукофотларига сазовор бўлди. Жумладан,
“Шуҳрат” медали билан 8-сонли умумтаълим мактабининг физика фани ўқитувчиси Жуманиёзов Эркабой Рахмонович тақдирланди.
2-сонли умумтаълим мактабининг жисмоний тарбия фани ўқитувчиси Қурбанов Жавдат Ибрагимович, 32-сонли умумтаълим мактабининг она тили ва адабиёт фани ўқитувчиси Қўлдошева Мехринисо Мардоновна, 303-сонли умумтаълим мактабининг маънавий-маърифий ишлар бўйича директор ўринбосари Мухаммедова Нилуфар Камоловна, 331-сонли умумтаълим мактабининг директор ўринбосари Ибрагимова Шоира Нормуминовна ва 331-сонли умумтаълим мактабининг бошланғич синф ўқитувчиси Бобоқулова Венера Неъматуллаевна каби ўқитувчиларимиз “Халқ таълими аълочиси” унвони билан тақдирланишди.
Азиз устозлар!
Биз бугун замонавий билим ва касб-ҳунар, хорижий тилларни пухта эгаллаб, катта умид ва ишонч билан ҳаётга қадам қўяётган, эртанги кунимизнинг ҳал қилувчи кучи бўлган минг-минглаб фарзандларимиз камолида ўқитувчи ва мураббийларимизнинг беқиёс ҳиссаси борлигини яхши биламиз ва сизларнинг бу улуғ хизматингизни юксак қадрлаймиз.
Сиз, азизларни қутлуғ байрамингиз билан яна бир бор табриклаб, барчангизга сиҳат-саломатлик, бахту-саодат, эзгу фаолиятингизда улкан муваффақиятлар, хонадонларингизга файз-у барака тилайман.
Ҳамиша соғ-омон бўлинг, муҳтарам устоз ва мураббийлар!
Янгиҳаёт тумани ҳокими
Х.Иногамов
