01-10-2023
1-октабр — Ўқитувчи ва мураббийлар куни!
Бу кунда барчамиз бизга сабоқ берган, илм йўлларида йўлчи юлдуздек йўлларимизни ёритган ва бу вазифани айни пайтда ҳам шараф билан бажариб келаётган инсонларни касб байрами билан табриклашга ошиқамиз. Албатта, ҳар биримиз исталган соҳада меҳнат қилмайлик, устоз ва мураббийларга эҳтиёжимиз бор. Аввалига мактабгача таълим муассасаси, кейин мактаб, навбати билан олий ўқув юртида устозлардан сабоқ оламиз.
«Халқимизнинг устоз отангдек улуғ» деган пурҳикмат нақлида ҳам ўқитувчи ва мураббийларга бўлган самимий эҳтиром намоён. Бу байрам, аввало, ўзининг билим ва тажрибаси, истеъдод ва маҳорати, инсоний фазилатларини, кўз нури ва қалб қўрини аямасдан, маърифат йўлида беминнат хизмат қилаётган устоз ва мураббийларимизга нисбатан халқимизнинг азалий ҳурмат-эҳтиром намунасидир.
Ҳақиқатан ҳам, умрининг кўп қисмини ёш авлодга билим ва тарбия беришга, уларни миллий ва умуминсоний қадриятлар руҳида камол топтиришга бағишлаган, бир сўз билан айтганда, Ватанимизнинг эртанги кунининг пойдеворини яратаётган бу инсонларнинг олижаноб меҳнатига ҳар қанча таҳсин айтсак оз.
Азиз устоз ва мураббийлар!
Барчангизни Ўқитувчи ва мураббийлар куни билан чин қалбимдан самимий муборакбод этаман.
Сиз бизлар учун ибрат намунаси, юксак инсоний фазилатлар тимсолисиз. Сизларга масъулиятли, машаққатли ва шу билан шарафли меҳнатингизда зафарлар, оилавий ҳаётингизда эса бахт, омад ёр бўлишини тилайман. Барчангизга шогирдларингиз камолини кўриб юриш саодати насиб этсин. Ёшларга илм бериш, уларни комил инсон этиб тарбиялашдек масъулиятли вазифани адо этишда асло толманг.
Ўйлайманки, сиз меҳнаткаш устозлар бундан кейин ҳам бунданда юқори поғоналарни забт этиб, ватанимиз равнақи учун муносиб шогирдларни етиштириб чиқарасиз. Сиздек меҳнаткаш, фидойи устозлар борлигидан фахрланаман!
Ҳурмат билан Янгиҳаёт тумани ҳокими Ҳаёт Иногамов
